Cy entrez, vous, & bien soyez venus
Et parvenus, tous nobles chevaliers.
Cy est le lieu où sont les revenus
Bien advenus : afin qu'entretenus,
Grands & menus, tous soyez à milliers.
Mes familiers serez, & peculiers :
Frisques, galliers, joyeux, plaisans, mignons ;
En général tous gentilz compaignons.

Compaignons gentilz,
Serains & subtilz,
Hors de vilité,
De civilité
Cy sont les houstilz,
Compaignons gentilz.

Cy entrez, vous, qui le sainct Evangile
En sens agile annoncez, quoy qu'on gronde.
Céans aurez refuge & bastille
Contre l'hostile erreur, qui tant postille
Par son faulx style empoisonner le monde :
Entrez, qu'on fonde icy la foi profonde,
Puis qu'on confonde, & par voix & par rolle,
Les ennemis de la sainte parole.

La parole sainte
Ja ne soit extaincte
En ce lieu très-sainct.
Chascun en soit ceinct ;
Chascune ait enceincte
La parole saincte.

Cy entrez, vous, dames de hault parage,
En franc courage. Entrez y de bon heur,
Fleurs de beauté, à celeste visage,
A droit corsage, à maintien prude & sage.
En ce passage est le sejour d'honneur.
Le hault seigneur, qui du lieu fut donneur
Et guerdonneur, pour vous l'a ordonné,
Et, pour frayer à tout, prou or donné.

Or donné par don
Ordonne pardon
A cil qui le donne :
Et très-bien guerdonne
Tout mortel preud'hom
Or donné par don.